LILY CHIA NON SAP LAI

By ~ Dizz Guite

Writer’s note : Bawl thak zual ni..

College kai di’n ka lawnu Chingboi toh ka hong kuan ua, Lily na sam bang chik a na tan e? Na nak kilawm e hon chi a, kei leng kipak lua, kilawm taktak ka maw ? Zan a ka nu kiang a ka gen leh hon vatanpih hiveh , chi’n sam puah dingdan leh kichei dingdan gen kawm a ka hong pai-pai uleh ka College huangsung uh tungkhin ka na hi maimah uhi. Room ah ka lutma un zuntha di’n zunbuk lam kon zuan ua, Zunbuk lam a pasal zuntha hong paite’n hon thoh ua, ..Ehem..!! Ehem!! Hon chih maimai uh leh leng ka zum lua a ka sam tan thak ziak ahi daim? Chi’n zunbuk sung ah ka tailut a limlangh ah kong ki-en thak zawzen hi.

Room sung ka lut tanpha in ka mai bang a san pempom maimah lai a, Chingboi in zozen zumna mahmah chia hoih hon sa ua ei lel tak voi, hon chih san zawmah lai chu ka zum a kibehlap deuh-deuh mai hi. Ka laibu lakhia in laisim kong kipat dek leh Pasal khat in laisiam dite chu hahpan uh ei ! chi’n hong chiamnuih a ken leng kihailua a sim-sim mai ngai a ka, chi’n ka dawng hi. Ka laisim hon na en-en mawk a, ka laisim ka lung a lut thei non kei mawk hi.

Teacher pa hong lut in class lak kong kipanta a, lai hong hilh lai nasan in huai tangvalpa’n hon en nilouh a, ken leng ka engu zauh zel a, a chang in bang ka ki-entuah kha ua, huai chiah chu ka chih nang theilou in ka kun top zel mai hi. Chingboi in, Lily nang a bang chi e ? Kunkun mawk hon chih chiang bang in bangmah chilou chi khong in ka kimelh khiak san sek a, himahleh hon na guktheih sim chu ahi ngei ding, zum hatnu lawmlawm mai teacher pa lai hilh ngai maimai oh, hon chi a himahleh ka lungsim ah bangmah a om takei..

Teacher pa a ma class bei tak in ka laibu guang zok in Chingboi kiah huai tangval pa hon etdan ka genpah a, aman le hon kup pihpah vang lak a, a guk in chu hon ngai ahi ding chi’n ka kipehoih mahmah hi. A ziak bel a melhoih in a duang ching kicheidan lah sang a hih chia . Sunkhawl hun chiang bang in a ma omna lam ah ka vapai cheuh zel ua, himahleh houpih ngam ding bang ka hi kei..

Hun bang tan hiam nung in, kong kihoupih kha ua huai chuh sunkhawl lai zuntha dia ka pawt leh kahlei bul ah hon na ngak a, ka kitonsuk ni uh ahi. Ka hong kihoupih ua nitak tawp chia kiton di’n hon ngen a ken leng awle na ut nak leh poiloupi chi’n zunbuk ah ka lutsan a, nitak tawpphet in gate bul ah hon na ngak pah hi. Kong kiton ua, gen di thei le ka om kei ua ka kikhen ding un nek lim in aw chi’n hon kha a, huai ni chu hi chia bei mai ding ka sak leh inn ka tun in ka ngaihtuah thakthak leh bang dia paulou a paipih tel ka dia aw ! Kei bek in gen di zongtawm mai leng hoih di hia ? chi’n ka ngaih tuahtuah mai hi.

Nitak laisim di’n kong kisata a, laibu ka lakkhiat chiah leh a mel ka mitkha ah hong lang dundun in hon en a hon nuihsan heuhau dan khong ka ngaihtuah khia a, kei kia in ka nuinui maimah hi. A chang bang in ka bag pom tonton zel a hai ka bang in ka thei. (Hahahhaa) Ka kitondan khong uh ka ngaihtuah chiah amah toh kitonkha bang ziak a dia aw ? Bang dia kei toh kiton ut a dia aw ? Hon ngai hi di hi leh le amah hon gen ma genlou di , chi’n ka lungsim a kisel tuah nilouh hi.

Huchi’n kalkhat val khong kingaihna thu genlou in kong kithuah toutouta ua, a guk tak in chu hon genta dia aw, chi’n ka na ngaklah mahmah mai hi. Hun bang tan hiam nung in ka numei natna in hon pha a, college kai ngaplou in ka om a, ka damlouh lam hon thei a, message hon thon in “Lily bang chi e , nong kai kei a ? Hon miss lua kei ve ! ” chi’n a message hong lut chu simnop ka sa petmah mai. Dam bang kisak zozen in a om, Zing chiah kong kaita d chi’n ka thukkik a, awle, kon na ngak di aw chi’n a man leng hon genkik hi. Ken le ka message pack beita hiai a topna chi’n ka thuk hi. Zing khua hong vakta a, kai dia ka kisak leh ka damlouhna in honpha a, kai zoulou in ka khawl kikta, a lung himawh zaw a hi dia, ka inn uah hong zawn a, ka ngap kei . Nang a na kai mai in , ka chih leh kei kia ka kuan ut kei ka kik di, chi’n ka inn ua pat a kik maimah hi.

Sun kamkaal in ka innkong uh hong kikiu ging keuhkeuh a, kua a dia aw chia kong ka vahong leh amah a na hi maimah a , U KHUAL hong lut aw, chi’n ka innsung ah ka lut hi. Laa khong ngaikhia a ka om lai un , ” Lily gen ut nei ka hi . Na lungsim lou lua ahihleh leng non na ngaih khiaksak kon ngen , “chi’n a hon gen panta. College kai dia nong kuan a ni masa pen in kon mu a. himahleh kon houpih ngam kei. Na lawmte ka et chiang in na kithuahdan uh nop tuak leh etlawm ka sa. Nang kon et non chiang in na khohei leh na duang kilawm tak te’n ka mit la in it huai kon sa a, gen ngam hun ding ka ngakngak nalam in hun saupi ana bei manta. Himahleh, kon ngaihna genlou thei ka hihlouh ziak in tu’n na theih ka gingta. Nang leng non ngaih thuk sam lamen ka hi, chi’n hon gen ka zak tak in ka ngaihna om khin ahih ziak in pomlou thei ka hi kei . A kiang lam nehphei in na taktak mah hia, U Khual ? chi’n ka dong kik-kik lai hi. Taktak mah hi . Lily nang kon ngaihna a taktak mah hi, chi’n hon gen kik hi. Huai ni apat kingaihna guikhau kizom kong hita uhi.

Hun hong pai zel in, ka ngaihna hong lian deuhdeuh. Niteng bang in a mel muh ka ut na ziak in damlouh ni chih omlou in College kai teitei ka tum a, amah ka muh a tomchik ka kithuah mai uh leng nuam ka sa mahmah in ka lung a kim petmah hi. Hun sawt kuamtak kong kingaih zawh un , U Khual in nitak pawt di’n hon zawn a, kei leng ka lawmnu Chingboi zawn in ka vapawtpih a, mun thovengna deuh ah hon pai pih in, ka liang ah a khut hon koihphei in hon kawi a, Lily i kingaihna leng sawtta. Mite bang in nuamsa khawmta leng hilou hia ? chih leh ka muk hon tawp thuah in a ang ah hon kawibelh a , kiteng nai loupi’n huai nitak chu taksa nop sakna hon zatpihta hi.

Huai hun laitak in bel ka U Khual ka itluat ziak in ka taksa leh ka pumpi amah adi’n piak ngam louh ka nei nawn kei. Aman leng hon it taktak a Zi dia hon en ding mah a ka koih ziak in. Hun hong paizel in, ka ngaihna lian deuhdeuh leh houpih lou a om theilou ka hihman in inn ah hong hoh ding bang in ka zawn sek a, a chang bang in kei ka vapawt zel hi. Hichia kong kithuah touhtouh chiang un nupa hinkhua tam veitak kon zang khata uh. Ni leh khate hong kidang in U Khual hong hoh vang hiai-hiai a, College ah leng muhkhak meng-meng di’n a om nawn takei hi. Himahleh, ka muh khak chiang in bel ka vahoupih zel a, aman leng hoih tak leh nidang a kampau dan mah in hon dawng zel hi. Hon houpihdan dang nai lou hiven poikei midang ngai hi kei na’nte ka chi zel a, hong hawh ngeihlouh chiang in lah ka lung a nuam kei zel hi. Kei hon ning hi’n teh hon khen ut hi ding chi’n ka ngaihtuah sek zel hi.

Ka exam ding uh lah naita. Kei lah laisim peihlou . U Khual lai ka thon chiang in lah Laisim ing a, pawt manlou ka hi nang le lai hoih tak in ana sim aw, hon chih chiang in . awle chi’n laisim di’n ka hong kisa zel sam hi. Laisim dek leng le ka lungsim ah ka omdante uleh tua hon bawldan tuamguih ka sak ziak in ka lungsim a guktak in a gim mahmah a, kuamah kiang a lah kum ngamlou ka hihman in kei kia buai in ka buai gu ten hi.

Exam ka hon zawh ni ding uh College gate ah ka na ngak leh nungak nou kei sang a naupang zaw ding khat toh hong kiton ka galmuh a, aman leng hon mupah zaw ahi ding, ka kiang hong tung manlou in a kihemkhia geih a, ken leng Eh.!! bang chi a dia aw, nidang a kei toh kiton den hi’ng a , tu’n lah a mang vengveng a, ka pai mai ding chi’n kei kia innlam zuan in ka pai touh leh ka lawmnu Chingboi in Lily hon na ngak dih chi’n hon galsap a, Chingboi toh kong kiton uh leh UKhual nungak nu na theita hia ? hon chi mawk a, lamdang sak leh hamhaih melmul, kawm in , kua a ? Ka thei kha kei e ! ! Kou kingai lai ka kisa a ? chi’n U Khual nungak neih lam ka hon thei panta.

Nitakkhat dawr kong a ka tut leh a lawmte toh hong pawt in lampi a hong pai ka na galmuh a, kei leng hon houpih khak leh ka gen ut om a hih chia chi’n dawr kong a naupangte ka vakimawlpih a, dawr kong a hong tun un, hong hawh dek ka hi uh hon chih tak in chance lem e, chi’n ka lungsim guk ah ka gen dingdan bang ka ngaihtuah pah zunghzung mai hi. Innsung ah ka hong lut ua tuilum kon ban hawm khit in a lawmpa khat in Lily nougel a na kihel ua, kou khanglam ah nungak ka vahel di uh chi’n hon pawtsan vek uhi. Kei leh ka UKhual kia innsung ah ka omtak un a kianglam ka naih phei a, U Khual, nang midang toh kingai na hihlam tak kon thei a bang a, dik mah hia ? Huai lastday ni a nong kiton pihnu kua a ? chi’n ka dong pah hi. UKhual in leng midang toh kingai ka hi , chih ding le ka thei kei. Huai ni a ka kitonpihnu toh chu kingaihna thu le gen ngei khang, chi’n hon dawng a, ken lah ka dot nop pen huai nu koi lakte a, kua a ? chih dong ut ka hi hi. Himahleh, hon dawng dan a buai sim pah ziak in enkhe phot di chi’n ka dotbeh nawn tuan kei a, kei hon ngai na hihleh midang buaipih ken aw , chi’n ka gen khit in , a lawmte hong tungkik non un, pai ni Khual chi’n ken le Mangpha ua aw.. chi’n mangpha innkong ah ka vakhak tei hi.

Hun hong pai zel in, suty zoh kalkhat bang hong hita a, UKhual a ging zakna hong gamla hiai-hiaita. Ka muanmawhsim ziak in nitakkhat ka lawmnu Chingboi toh ka vapawt ua leh UKhual midang nungak khat toh kiton ka galmuh a, ken leng kua a hi dia aw ? chi’n ka delh bawl leh Dawr khat ah vanlei in a hong khawl ua huai laitak in ken leng a numei mel ka muh ut ziak in dawr ah zarda ka valei khempeuh a, nungak a tonpihnu mel chu kon muchiang mahmah ta. Kei gen nu mah a na hih ziak in, ka hehtha hong suak lua mawk a, ka lawmnu kiah pai ni chi’n kintak in innlam ah ka kikpah ua, inn ka tun in ka omdante uh leh tua midang toh hon kop ahihdan ka ngai tuah chiah thuakdan siam zoulou ka hi ding a, ka mittui kham vuallouh in hong luang huphup mai hi. Ka lawmnu Chingboi in a hon muh tak in Lily huchi kei ve, a kingai le hilou thei a hi uh. Lawmta kholai pawtkhawm le hi thei ahi chi’n hon hehnem mah leh ka gingta thei non kei. Sunkhat innkong a tu in UKhual message ka hon khak leh ka pawtlai inn ka tun chiah awl in kon text na di chi’n hon thuk lel a, nitaklam dak 5pm tan in leng hon text kik louh tak in ka hehthasuak lawta ahihchia, nungak dang na ngaih leh gen chiang in zan lam nitak a na kizuihpihnu toh kingai hilou maw nang ? Ka chih leh, ” hi, kingai chu ka hita uh, ” chi’n hon thuk a ken leng ” kei hon khenlou a huai ngai na hih leh, tun kei hon khensiangta mai in ,wi omdan na theihsa hi, nupa bang a non ompih nung a non khen ut leh nangthu. Kilawm na sak a huai nu mah ngai veve ding na hih leh ” chi’n ka gen zuau-zuau leh, “aw , kikhen siangta chi mai ni. Amah ka na ngai khata, hun luiite mangngilhta ni ” hon chih san zaw naa ka sa lua mahmah a lupna lam zuan in ka tailut a, kap in ka kap a, lah khen a om ka hi veve hi.

Nidang a zaw ki-It, kingai a nupa bang a ki-om hia ! Tua hon khen mawk lamdang na e ! chi kawmkawm in utleh poikei ka mangngilh sawm mai ding, chi’n ka kihalhsuah zel. Himahleh nitak khua hong mui chiang in ka lungleng lua a melmuh ding bek ut na ziak in lawmte khong zawn in lamlian dung zui in ka va pai sek ua, a chang in ka mukha a huai chiah thuaknuam tuam ka sa . Himahleh a chang chiang in a nungaknu toh hong kiton ka muh chiang in a nungaknu ka haza/thrik lua mahmah a hehsa khong in inn ka kik hun bang a tam mahmah hi. Khua hunte hong kikhel in, mangngilh ding chi mah leng a khua hun zui a lunglen in hon pha zel. Khavak nuai a pawtkhawm in ka khut hon len a ka kiton helhhelh lai khawng uh ka phawk thakthak a, phalbi hun hong tun chiang in lah a anglum a belh thrinthren a tangthu a hon gen lai ka ngai lawzel a, kei kia in ka limlak peuh uh en in UKHUAL Ei LILY CHIA NON SAP LAI ngai hi na mai zen ing e ! Tun lah na lungdeih paalnou duang etlawm toh khut kilen in nunnuam vabang lengta ding chin a maw ! Na sakmel leh na tongsuakte zanpaak namtui sang in namtui zaw lai e . . . Kei adin hi’n lahna kawi lianem sakmel mu leng na tongsuakte kei din gulgu sang a hat zaw gutui dawn bang ing e. . . . Na mangbat ni’n Lily chi’n malbang non kouh leh zodam tui bang siang in ka vang zu bang hong tawp kik in aw UKHUAL ka lunglen luat chiang lai khong ka khak cheuhcheuh zel a lah muh phak in leng a om nawn kei.

Hiai bang a hon bawl mai-mai ding a hihlam khawl hi leng ka pumpi a mah a ding in pehet lou mah ding hing a, lah ka kingaih lai un itna dik leh ginom ding mah sa ka hi a, tun chu ka theih leh ka virginity khahsuah ka hi. Maban ah chu kiveng siamdeuhta ding in ka kigingta. I it tak-takte a dia chu kiphal vek zel hang a buai huai mahmah hi veh aw. Tutan a leng ngai lai ka hi, itluat ziak hi chi mai ding .

©Siamsinna leh Vakiangbu