KHAWL KHAWM LAI NITE
By ~ Peezzy Byak Gwite
Hun leh kumte’n hong pailiam san zungzung
nung un, ken leng pawl xii ka hon zilta a,lawm leh vualte toh
khawlkhawm nuam ka sa mahmah hi. Huchia ka kipolh lai hunte un ka lawmte
bang in lawm ngaih bang hon neinei ta mai ua himahleh ken bel lungsim
in ka vei kha himhim kei hi. A ziak bel laizil lai ka hihman in ka
kisubuai ut kei hi. Huchia college khawng kai tou zel in hunte’n hong
pailiam zel in July kha lak di khong in ah lawmte toh kapawt uh leh
nungak nou melhoih tak duang ching a henger hoih nalai liapaal khat ka
vamu kha chu..ka lunglai gil a tham denta mai hi.
Mihing lunggel chuh apai kei tel mai. Tua
ni’a ka muh nu min leh veng bang ka thei ut mahmah mai a, himahleh
lawmte hon thei di bang ka lau a ka hilh ngam zok kei hi.Nitak laisim
chiang bang in ka ngaihtuah khasek a, lungsim ahon luahzou mahmah mai ta
hi. Kei leng ki-im zou nawnlou in ka lawmte ka hilh leh ka lak ua khat
in, ken amin ka thei a veng uh toh hon chi bang chuh lungsim guktak a
kipahna in ka dimta mai hi. A guk bang in ka nuinui kha a, huai ni hun
ka zatdan bang nuam ka sa tuan mahmah mai a, a zingchiang lah kiginni
(saturday) ahih chia lawmte’n hon pawtpih sawm ua ken leng poilou chi’n
ka thukimta uhi.
Kiginni ahong hi a, suun hunte zangkhin
in nitak ann nekhin in tua sakmel etlawm tak mai lianute inlam zuan in
ka hong kizuisukta uh chuh….a inn uh bang tunkal ka ngaklah mahmah mawk
hi. Huchia kihou kawmkawm a ka hong paisuk uh leh a inn uh ka hong
tungta uh chuh, a gate uh ka hon kaan uh toh kiton in ka zum lawguih a
chimul bang thou in ka khe bang liing pian in ka om hi. Kong ka hon
kieu(knock) ua,kam nemtak mai in hong lut aw…chi’n ana welcume uhi. Kou
leng lutzom ngal in Mercy om hia chi’n ka kan ngal uhi. Inteekte nu’n
ah, haa, om mah e hon chi a , sap toh ahon thuah ngal a, Mercy ngeileng a
room apan in hong pawtkhia a, amel hoihna lah akiam tuan kei abesam
bang saau in hon khahkhe ngiahngaih bang chu etchim theih ngeilouh ahi.
Houlim kawmkawm in hun zatdante khawng lawmte toh hong kikum tuah ua,
kei chih mah tak ka na zum a hon houpih nate uh ka dawng chauh lel hi.
Huchia hun bangtan hiam ka tut nung un
zan leng hong sawt ding ahihman in kou le ka pai sawm ua aman leng hon
khakhia in mangpha kikhak in ka kikhenta uhi. Amah lou ngal ka lunglai
hon kuai ding omlou aiman in hun awl neihchiang in ka vahoh zelzel uhi.
Aman leng hon maingalta aichiang in ken
leng ka iit dan thute amah lou ngal ka lungsim luazou omlou ahihdante ka
hilhta hi. Mercy in ahihleh hon dawng ngam pah kei a, phone No. bang
kipia in ka valenglaat louh kar in leng ka ki text zelzel ta uhi.
Khua hunte kidang zel in tung a ni leh
khate’n zong gen nei mahmah uhi. Ken leng Mercy kiang ah amah ka iitna
thute ka gen zomtou zelzel a, amah adia sih toh dong a muanhuai ding ka
hih dan bang,amah lou ngal ka lungtang laigil dawt kha zou ding numei
dang omlou ahih dante hoih tak in ka gen h. Nikhat text message khat
hong kikhak a, Mercy in apute inlam pha di’n hon zawn a ken le’ng lem
sakpih in ka vapawtta uhi.Huai nitak bel kha(moon) avak pha mahmah a,
akiim a aksite leng vaak diak in kilang hi. Kou leng lampi pai kawmkawm
in ka kihou ua,bangtan hiam ka pai nung un apute inn ka tungta ua,
huchi’n Mercy in ahih dite hon hih zoh khit in kou le’ng innlam zuan in
ka hong paitouta uhi.
Lamkar ah kichiamnuih kawm in hun ka hon
zang ua, Mercy in, uSep chi’n ahon sam a, ken leng bang a Mer, chi in ka
dawng hi. Aman tawlhuai lua waiting shed a khol phot ni ahon chi a, ken
leng awle , chi in ka khawl tawldam uhi. Huai a ka khawllai un, kha
vaak leh aksi tang singsengte’n a lungsim luah zou tak uh chuh ahi
dia..Usep, ka kiang ah na itna thute na hon gen zel a, ka kipak lua ,
kei lel tak hon it, hon ngai om ahih maw chih ka thei a, nong gen tung
apat in ka lungsim na hon luahpah hi. Usep,na itna kon koppihta chih
kampau hong pawtkhia ka zak bang chu… ka phamdong in ka bil sung apan
apawt nawn kei ahi mai.
Huai nitak apan in kou le’ng,Mercy toh
itna khaugui kazomta uhi. Ngaih te toh khawlkhawm mahmah nuam ka sa a,
nou leng nuam na sa bok ding un ka um hi. Ahih a, zan hong sawt ding
aitak man in kou leng innlam ka zuan nawnta uhi. Mercy te inn a tomkha
khawl in kei leng ka inn lam uh ka zuan touta hi.
Ngaihzawng a kisubuai sawmlou pa kha
ngaizawng nei in ka hong buaita a, kong khat ah, ka laisimna lam bang ka
bah khak ding ka lau a, kisukbuaisak louh chu ka tum tinten hi. A
vangkim in phone tungtawn bang in ka kihou zel ua, itna khuaizuu bang
khum chia ana gensek uh dik hi na tel e…chih hun atam thei mahmah mai.
Ni leh khate hong kikheng zel in kum tawp lam hon naih mahmah ta hi.
Mercy toh khen nawnlou ding in tongchiamte bang nei in kihawmthoh tak
mai in hinkhua ka hon zang panta uhi. Mercy in ahih leh pawl-x zel dek
pan ahi a, asungte un phone tawi sak nawn talou uh chu a chimhuai mahmah
mai hi. Nitak chiang bang in thomhau tak in ka om sek a, huchia
lungzuang tak a ka omlai in ka phone ahong ging a No. ka thei khak
ngeilouh ahihman in ka la pah kei a, hong ging zom zel ahihman in
poimawh gen ut nei ai di , chi’n ka pick-up ta hi. Hallo , ka chih phet
in uSep, na nau Mercy ka hi ka lawmnu phone kon zatkhel ahi. Kon ngai
lua . Hong pawt lou dek maw ?? chi’n hon dawng a. Ken le’ng kingaihtuah
zek in kong pawt d, ka chita hi.
Ka kihou zoh un, kei leng ka pawtkhe ngal
a, a inn uh ka tung rang khop mai hi. Hun sawtsim ka om nung in ka pai
ahong hunta hi. Zan sawt ding ai tak man in, Mercy in hon khakhia in
mangpha kikhak in ka pai dek leh, uSep hon chi in hon kawi a, itna zaw
alian tel mai maw . Ka lungsim in achi a , ken leng ka kawi thuk ngal
hi. Huai kawmkawm in, kua mah kizuausan kei ni aw, hon chi a, ken leng ,
“aw ” chi’n innlam ka mahnoh ta hi. Ka nih un chu khen nawnlou ding
sihna in hon haallou ngal ka kichita uhi.
Hun leh kumte hong pailiam zel in Manipur
kumpi vaihawm ding kituhna om nawn ding aitak man in, Mercy toh deih
bang in ka tukhawm tam kei uhi. A ziak bel amau in leng office khat a
dia kizang kha ai man in,a inn dimdim ua mihong pawt khawmte dawn ding
singpi bawl in apang a..kei bel a ann huan buk uah ka na tu kenkan a,
ahon melh zel a , a nuihmai kilawm takte toh hon hou pih zelzel hi.
Nikhat amah leng tawl kisa ai ngei ding a, a lawmnu tungtawn in pawtkhe
di’n ahon sam a, ken le alawmnute innlam ka manawh ngal hi. Kou gel
chauh in mun thoveng na mahmah munkhat ah tukhawm in ngawng bang
kawikawm in solkha tang singseng nuai ah ka tu uhi. Mercy in kisuanglah
chi tak mai in uSep hon theisiam in aw. Nang ka inn uah gina tak in kon
pawl man kei a , hon chi niitniit hi. Ken leng a om thei mah ahi chi’n
ka nem zel hi. Huai kawmkawm in nihgeel lungtuak a ngabang a khawlkhawm
nuam ka sa ua. Ka thil ut te uh bang kikum in hun ka zangtou ua, hucia
ka kihouhou lai un, ngaih nang toh omkhawm mun khempeuh nuam hi. Kei
kiang pan paikhe nawn ken maw ngaih aw, ka chi ua.
Mercy in ka muk a hon tawp(kiss) ta hi.
Aman kon itna suutsuut ning gengen ning chileng suut zoulou ding,
genchim thei ngei kei ning, chin in hon kum hi. Hun in hon ngaklou aiman
in, sa leh zuham teng zong giahna zuanthei uh aicia , kou leng saumang
tuun leh zua sauliim ka bel kikta uhi .Election honG nai hiaihiai a, kha
3 lel leng om nawn lou aiman in hun chih mualchih a omte amau mizuih pa
uh aching ding deih vek uh ahi ngei dia, Mercy sungkuante atam zaw tham
zinkhia uh aiman in kou leng a khualzin pen uh hun lemchang a la in
nitak chiang in ka vapawt thei gige hi. A pi leh pute heu a innngak a
pang uh aiman in, Mercy pi bang in hucia ka va hohhoh leh thukhotang
dawng bang ana hihsak sek hi. A ziak bel kei pa’n leng midang khat zui
aiman in leh ka pa mizuih pa pen hat zaw a kilang aiziak ahi hi.
Hitamahleh amau gintak khel in ken election vai khawng ah ka lunglutpih
lawvak kei a,houlim vangtang khong in hon na genpih sek mah le uh, ka
kum thei lovak kei hi. Huai nak sang in ken bel ka it Mercy toh ka hun
tam zaw zat ka telzawta hi. Simlei tung ah Mercy lou ngal ka ngaih
liapal omlou ai ban ah, mizatamte’n hon pampaih in thusia-lasia hon
genkhum mah leh, ngaih aw ken nang hon taisan kei ning.. Lungkham
mangbat hun in nang lou hon nem zou omlou chi kha ka la uh ahi.
Ni leh khate’n hon ngaklou in hon
pailiamsan zungzung uh aiman in kumpi vaihawm ding kitelna leng zoh ahi
ta hi. Election result bang leng puankhiak zoh ahita . Ka pa zuih pen
telching in om penmah a, huai sawng teng chu ka ngaihnou meel ka mukha
nawn mengmeng kei hi. Lungleen thei tak a ka om hun uh atam. A ziak chu
nidang a nitak teng a omkhawm gige ka hihman un. A chang in Mercy in a
lawmnu tungtawn in hon thu zak zelzel hi. Kum 2 bang ka kingaih nung un
Mercy sungkuante’n leng hon theita uhi. Kou leng maingaltak in ka kihel
theita uhi.
Khen nawnlou dia tongchiamte kipsak
semsem in ka kar uh bang mah in hon subuai zoulou ding chi a ka omlai
un, lamet phaklouh tak in al awmnu apan thu kipahhuai lawvak lou ka za
hi. Huai cuh Mercy sungkuante’n kha hon deihsak lawvak lou uh hih tuak
hi. Kei le’ng kitheih khemmawh bawl in ka om hi. Mercy in leng hon gen
ngamloupi a, haksa sathei mahmah ahihlam ka thei hi. Huaite a kisuk buai
saklouh ka tum tinten lai uhi.
Hun ka neih dandan un ka kithu zak zelzel
uhi. Mercy in a lawmte phone khawng hon zang ai man in hun teng in
kithuzak haksapi ahong suakta a, gen di poimawh mahmah ai’ke ka ki thu
zak mengmeng kei uhi.A khen chiang in aman hon genlou in,skul ua a
lawmte kia gen in,a lawmte’n kei kiah hon hilh zelzel uhi.
Ka kingaihna uh alian semsem a..Vangtah
huai tak in leh ka kilam et phak lou lai un,Mercy sungkuante amah ana
vau sek uh ahi ngei ding a high skul kai lai hi zaw mah..Huaipa (septe)
toh na kikhen ding ahi chin ana gen sek uhi. Aman lah kei hon za sak
ngam kei a,alawmnu tungtawn in ka za hi. Aman le haksa a sa mahmah mai
hi.Nitak khat a inn uah ka vahoh a haksa na salaw di maw ? chi’n ka
dawng a. Haksa mah e himahleh kon khen ngam kei chi’n hon dawng hi.
Tuun leh zuate halvang in maw itna
khaugui a tat mai ding, lung in ka geel chi’ng lunglai meibang zing
e..kou leh huchi pipi in ka om tou ua, ka kihou vang mahmah ta uhi. A
ekzam na ding uh hong nailawta aiman in,a laisim suk buai ka ut kei hi.
Ekzam te hon zou ua amah leng free deuhta
aiman in kou leng nidang bang in ka kipawl nawnta uhi. Hucia ka hong om
chiang un a sungkuante’n bang mah gen het kei mah le uh, kei om louh
chiang in Mercy ana taihilh nakkhem uh aiman in ka kar un siatlam hon
mahnawh ta bang in om ta hi. Bang ziak a kei hon deihlou uh ai dia aw ?
chi’n ka ngaihtuah a, election lai a ka pa’n midang vazui a amau toh
kikhing kha uh aiman in leh ka pate lohching uh ai zawkmah ziak a hon
hua uh hi di’n ka gingta pen mai hi.
Hun leh kumte albang mang zeel, nun i nop
lai nite toh , lungzuang kah liang hehnem ding om bang in hinkhua ka
zat tawn bang uh a om hi. Kei le’ng nidang a ka pawt ngeinadan in ka
vapawt zelzel hi. Nitak khat ka vapawt leh a omdan ana lamdang mahmah
hi. Ka houpihna teng hon dawng a nidang a nuihmaite a ana houpih gige
pen bang chi ale chi’n ka lungsim a ka ngaihtuah hi. Hehna nei bel hilou
in ak guul mu mah a bang khualkhual a, kei leng sawtpi ka vatut hong
lem hetlou khat om hita e , chih ka phawkkhia a,sawt lou ka va-om nung
in ka pai sawmta hi. Mercy in leng hon kha a agate bul uah hon ngawng
kawi in, uSep nuam na sa kei lua di maw ? Ka sungkuante’n hon taitai ua,
khen di kho hon sawl ua, himahleh ken nang bang a hon ittu ding muh
nawn tuanlou ding chih ka lungsim ahi. Kon ngailua a lah ka om didan ka
thei kei chi’n hong khase sim mawk hi.Ken kon itna maw, kawlmawng pha
muh batlou leh tuipi mawng khat apan mawng khat muhtheih louh tuk a lian
zah dawng a hon iit ka hi. Lungkham ken khatvei ni hong suah hun om
ding ahi. Huai te ziak in kihih lungbuai dah ni chi’n ka nem hi. A nung
sawtlou in ka paisanta hi.
Inn ka tunma in msg hong lut a, u
inntungta maw? chi’n Mercy inn apu phone hon zang in, lampi ah thawmhau
hetlou in hon koih hi. Kei leng inn ka tun nung sawtlou ka tawldam zoh
in ka lumta hi. Huai hun tan in leng thawmhau hetlou in ka kihou tuah ua
nuam ka sa mahmah uhi.
Kum 3 bang ki-it tak a hunte ka zat zoh
nung un, mihing lam ah kou kar hong subuai thei ding a hong tam hiaihiai
a, Nisim in pung hulhul mah hong bang tamai hi. Kihou hetlou leh kimuh
kha hetlou in a kha asim bang kou mahni college/skul kainate uh awlmoh
tuak tak in ka om uhi.
Mercy in Pawl-X sinpan aina kawmkal ah
nidang bang in ka kithuzak nawn taktak thei kei uhi. A chang in a lawmnu
tungtawn bang in thu om dante ka kithuzak thei zel ua , huai in neukhah
lungmuanna hon pe zek hi. Hon daltute leng hatsem uh aitak man in
Kou leng ka hih theina zah un pan ka la
ua. Huchi mai a ka itna uh abei ding bel pamlua sa’ng e..ka chi uhi.
Mercy in lak haksa salua ahi ngei ding a kiteng mai ni hon chikhum hi.
Chimawh mangbang lam aichih ka haih het kei a, ken le laizil lai i hi a
kamnei phot ni chi’n ka dawng lel hi. A ziak bel zite vakna ding omloupi
a khosak di ka ngaihtuah chian haksa ka sa zel a, nu leh pate kia ka zi
huai man di chih a nget tel di tuhun in thil hithei in ka koih kei hi.
Huchia ka gen leh aman leng hon thei siam hi.
Mercy in leng uSep na gen dik lua haksa
ka salua a huai ziak ahi kon itna zaw adai nawn kei hial ding hon chi
hi. Huai hun in kougel omkhawm ka hi ua, hun bang paihat ka sa mahmah
mai uhi. Mercy in a sungkuante lau zaw aina komkar ah ka itna uh huai ni
in tawp mai leh chi’n hon ngen a ken bel ka utpih louh luat lam a
theisa aiman in a gen ngam kei hi.Huchi kawmkawm a ka omlai un melma
zatam lai ah ka itpen tangzou nawnlou ding ka bangta hi. Lungkham tak
leh bangtak a ka omlai in itna khaugui kipeh lai hamham aiman in
lungzinna khenlam ah chi hun bang atam mahmah mai hi. Ni leh khate’n hon
ngak hetlou in hon paikheng zungzung nung un kou leng ka ekzam hun uh
hong tung ding aiman in ka laisimna lam ka pibawl san phot hi.Aman leng
huai hun sungteng ngak zou tak leh dohzou tak in ana om a, ekzam ka hon
zou nung un a vangkim in kimu zeuhzeuh uhi.
Himahleh nidang abang nawnta kei hi. Ka
houpihnate a zalou mah a diam chithei di khop in hon dawng ut lawvak kei
a ken leng nuam ka sa het kei chih aman le a thei hi. A lungsim nalua
aidiam ka mu chiang mahmah mai a, khovel a mihehpih huaite lak a khat
zaw ka hita mai uhi. A ziak bel kou gel ki-ittak a ka omlai un siang awm
lou zaw ka hi ngei ding ua kar simthu uh hon buaisak thei mahmah mai
ua, mihing pilna leh siamna in leng a zou nawnta kei chih ding ahi.
Huai nung siah kihoulou in sawtkuam tak
ka om nung un, October kha in hi amau sport nei uh hi ven huai sawng
teng Mercy lawmnu’n ah nitak kar in hon thuzak zelzel a, ka gen ut teng
uh ka gen zel uhi. Ka om dante uh ka ngaihtuah sek a bang dia hichi
lawmlawm a ka ma uh bing ai de aw chi’n ka kingaihtuah vungvung mai hi.
Kou hithei lah neilou kai man un ka tuahtuah uh chu pomsiam kizil mai
ahoih ta hi chih hun bang a tam mahmah mai hi. Lungkham kisa lua kai man
in ngaihtuahna a sau paithei mahmah mai hi.Sport a neih hun sung un
laam zil in Mercy te class leng a om ua, huai hun in ka kihou thei
zekzek ua, himahleh kimuan mawhna kampaute hon zatkhumta mai a naa ka sa
mahmah mai hi. Ken leng huai pumpelhna ding in ka lungsim ka khausak a
apha tuam taktak kei hi.
Ken leng ka lungsim bang ah kikhenpih mai
ding ai de o ka chisim zel a lah i first love aichiah haksa petmah mai
hi. Ka om didan le ka thei zouta kei hi.Hucia om meimuai a ka omlai in
ka phone ka sakhau apat in ka dokkhia a keivuak a ka gelgel sang in chi
in ka lawmpa kiang ah ka vapawtkhia a, lungsim neukha a zang zaw deuh
hi.
Nitak khat a laam zilna uah ka va om lai
un Mercy lawmnu tungtawn in ka kimuh tuah thei ua, kei leng kilop tak
mai in ka vapaipah a,himahleh kei gintak kheel in thil lamdang tak a hon
na gen khumta mai hi.Huai chuh ka zalmang dia zong ka deih louh leh
amah aw suak apan dia le ka phal hetlou a hon genta mai hi.Usep,kon
itlouh man leh kon ngaihlouh man hilou in i kar simthu pen kholsan mai
ni..chih teng ahon gen khum a,ken bel hi dah leh chia ka va selsel ut
kei hi a ziak cuh Mercy sungkuante’n hon deih louh uh aiman in.
Huchi’n ka kar ua ki-itna khaugui pen a
tatta mai hi. Atunglai in chu haksa ka sa mahmah a ka hun zatdan leng
atuam mahmah mai hi. Mercy ngei in le’ng haksa sa mahmah aidan a lawmnu
tungtawn in ka thei hi. Khenlou ding a tawngchiam e lah vabang in leng
khinta,Ngaih in lunglai ngilhta mai hi.Ken zong ka sialsial hang pakbang
palh kik nawn thei ta kei hi.Aw kei di’n thuak haksa hi namai e
aw..chih lou chu gen ding a vang mahmah mai hi.
Huai nung khakhat nung in Mercy in hon
call a nidang bang in ki-it, kingai bang in leh nidang a ka omdan un om
nawn kei mah le ung lawmta bang a kipawl di’n hon ngen a, ken leng ka
pompih hi. Ka kiitna uh zaw a bei thei tuan kei a, ka lunglen hun khong
un thil tuamtuam ka kikum zelzel uhi.
Septe in kum khat nung in Mercy toh ki-it
tak leh itna kichi a mawk a beithei hilou a sakdante sunhun khat a
ngaihtuah a,a gelhkhiak tangthu ahi a, laa in miksi ,thouvai lak ngaih
toh khawlkham mah nuam a sak dante thei theih in om hi. Nunlui ngaih zaw
lentang ngou meibang a lang in tumkik zelzelte’n mihingte toh enteh
huai mah a sak dante a inn kiang ua singkung nuai ah hon gelh khiak ahi.
BEI TA
Writer’s note : Hiai tangthu true story ahi a, a min hong kizangte laktawm ahi uhi
©Siamsinna leh Vakiangbu
Comments
Post a Comment