LALNGEILOU LAL ANAAAAA..
By ~ Gin Muanlal
Ka
neulai ahi a BRTF te lak a Labour a sepsaan lai hiven group lak a heutu
ding a mikhat akoih uleh thupi kisa mahmah ahiding a "tuachu kathuthu
hita..." chi in miteng tung a thuneihna nei a kikoih in a heute zahtaak
ut in amah utbang a zahtaakna amuhlouh chiang in khel gawt zel hi. Aman
huchidan a ahihte khosung ah gen in kou naupangte kiang khawng ah
kiphatna in azang a nuam asak tuak mahmah hi. Khakhat beipan in amah
thakheek ding in midang guan in a om a "MET (spelling dik hia chih
theilou) a kapanlai a...." chi in khakhat sung a heutu ahihlai agen
mangmoh hi.
Nikhat Bike a khopi sung kavaak uleh traffic
police te dinna lamka mun ah Gypsy khat ah tangval hon ahongtuang ua
side diklou a hongtai in ahon phukha dek tak uhi. A driver pan hard
break a matziak a hon phukhalou lel ahi ua a driverpa ka etleh kisuanlah
chitak in a nuisim a anungvual a tu tangvalten ngaihtak in "kin akin in
kihem o" chi in ahon kawk tenton uhi. Hehhuai simpi himahleh kalungsim a
thilkhat honglut in kanuih lamlam hon suzaa a kanui heuhau hi.
Mahni hihna sang a ikikoih sangchiang in nuihzaathuai pipi in ki omkha
zel hi. Ka ngaihtuahdan in Gypsy hekpa pen akichei dan in mineizou tak
innsung apan ahihtuak ziak in a Gari amah a mah heek hingei ding in
kakoih a anung a tuang,lauh huai taktak atu neinai a kua dikna leh kua
khelhna chih leeng khualtheilou a aw neihteng a hon taite pen mi
hauhsakna zarzou zual a Gypsy nungvual a tukha a miteng sang a kisang
koih zaw a "nang Bike heek maimai.." chi a hon simmoh a hon haankhum ahi
ngeiding hi.
Eineih zohlouh ziak a mite'n leeng deih mahmah a
leizoulou dingbang a koih a mite neihsa zar izoh khaak sunchiang bang a
thuak hak mahmah chiklai peuh in kitam hi. Mite neihsa zar izoh khaak
sunchiang bang a thupi kisalua a khaw-ul toh khekham zen a lampi
dungzuih lam mangngilh khak baihlam mahmah ana hiding hi.
Ka
ute khat damlou in aneihsa un a chitlouh tan seenna ding sum poimoh ding
ahihman in chimoh tak in bangloh ding a...chih ngaihtuahna lam ah kuate
hiam in BPL card neite a ding a govt hospital a seen luatlouh a ki
etkol dan Ministerpu tungtawn a ngaihtuah thei ahi chih za in huailam
sai asawm uhi. Lam etna liantak toh asai dingdan theite kawkmuhna ziak
in Lamka a kuate hiam in Ministerpu sik a huailam sai uh ahi a huaite
vanaih masak kilawm ahi chihziak in khat ava naih uhi.
Lam
etbanglou tak in lupna tung apat kuate a..kua behte a... chih dotna dawn
ahihkhit in Ministerpu le Phai a omlou ahi a banghiam thu a omleh kon
zasak nawn ding chih toh kiiksak in a om ua kial laplou tak in bangmah
thu zaaksak a om nawnkei hi. Lamka a om hileng huailam saite khat nidang
a hon ngaina mahmah om hi a kachi lungsim a himahleh Lamka kaphak in
nidang kingaih natna pen settheih tuak nawnlou ahihdan kava mukhia a
vanaihlouh mah hoih eive.... ken vote neilou ing a Lamka a influence
theihding kuamah neilou kahihchia Vote toh kisai himhim ah va kidaihlah a
phattuamna omlou ahichih thei in kava daakkei mai hi. Ka gil khawng
lian gawp a nidang a hon ngaina thou akatheih pen in hon haih ahita ding
kholak a kituah khak hun inle khut lik khum in ka omkei a huaiban ah
kansiamlou tak akihihman in nidang a lawm bang a kibawl a min a kisam
tua Sir va chikeile simmohna bang a honlaak sak khakding kalauh ziak in
nang namun ah kei kamun ah kachihsan mai hi.
Mihing kibang
hetlou ihingei ding a nikhat lampi ah Pu Chairman te nupa toh ka kituak
uhi. Midang bang a honhaih ding kasak leh nidang a U chi a honsaplam
kazaak ngeilouh himahleh hong khawl in "Eh...Ulal chik a hong hoh e.."
chi in kei houpih masak louh in hon houpih a dinkhawl in kahoulim zek
uhi. "...ka inn uh huaimun ahi a khatvei bek nahong vaaklut keidia
maw.." hon chihbeh a milian khat in hoihtak a honhoupih a ngaina takdan a
hon khaakkhiat tuh anuam mahmah hi.
Kaneulai in Phai ah ka nu
leh kapa toh ka nite kiang kava hoh uhi. Zingsang khat ministerpu
pianna pa in a inn ua hohding in hongzawn a kava hoh uhi. A innsung uh
hon fanpih a atawp in "Thangpu leng om ahi vahoupih un.." chi in a room
ah hongkha hi. "Kare Pazam nou hong kilang ngeilou... banghiam khat hon
hihsak ut lele na mel uh imuhlouh chiang a midang sum/thil ngen tam law
mahmah a hon kiphawk baanlou ahi...." chi in kisuanglah zezen in agen
hi. Kapai ding un "Ngaihlian (atung a damlou kagen pen) ading puankhui
khawl khat kon na ngaihtuah sakding a hong kan zel un..nahong kan kei
uleh adeih tamtheilua ahihchiang a inn itut leh nikhat leeng omtheilou
khop a pawkhe ding mitamlua... huai ading ahi chilele eisang a ki inn
neisak zawphial uh ahihchia ki humtheilou ahi aw.." chi in vahoh hunding
khat hon gen hi. Huaihunlai a singtang apan Phai hohna ding Bahara
natawm haksa kisate ahihman in kapan hon vehpih nawntuan kei hi.
Milian ineihte uh mihai ahihlouh ziak un houpih anuam ua lal dingmah
leh ana lal ngeimah ahihziak un lal dan asiam uh hi in kathei hi. Amaute
ah hehpihna a om chih ithei a amite uh khual in mipite toh kithuzak na
nopzawkna ding gel in amau ai ohding akoih tiltel uhi. Hihhoih mahmah uh
chihlouh theihlouh hi. Milian khat kongbiang ah mi nautaang vakidak
gige theilou hi. Security ziak hiam mipi tamluat ziak hiam leh a omna uh
agamlat ziak in migenthei leh mizawngte ading diak in inn thupitak
kongbiang a vadak nuamchiam louhial hi. Huaikhawng honkhualna ziak ua
ilak a amau sik leh taang ding mikoih uh hiding hi a....
Politician khat in huaite behte kia na ngaihsak ding uh chi a anuai a
akoihte a thuhilh gintaak huai kasa kei hi. Adiak in eite lak ah behkhat
ziak a telching a ki omding in gintaak huaihetlou hi. Sab pan a
maubehte kia a ngaihsak..a mah mite kia a en... amah vote loute bangmah
in a mukei....chia kigente Sab pa omdan ahikei himhim ding... Ministerpu
Behte ka hihet kei ua himahleh nget ngailou leh khasiat thugenlouh a
thil hon hihsak louh kisuanglah thei Sab in amah behte kia a chi
teentuun kei chih achiang hi. Huaikia leeng hilou in amah Vote khading
mun a om kahikei uh chihleeng athei mahmah hi.
Gypsy nungvual
atu a amaudiklouh ahihdan kisuanlahna neihetlou a hon tai ek ek te toh
mitampi kibang in kakoih hi. Ei tuankhak munlouh ziak a mite neihsa a
iva tuankhak zual thupi luadan a kikoih in midangte bangmah amulou
ihimai mah uhi. Anei taktak te zaw neihsa kiphatsak pih ngamlua omlou uh
hive aw... Anei taktak ten kei kahin naakleh midang sileh poikei chilou
in midang ziak in kei a asekha ding...midang a ziak in kei a amel
hemkha ding... chi in kiveeng mahmah uhi. Huaibang in mipi lubawkkhat
hingal a mipite khasiatna ding bawl a omkeidia, mipite muhdah ding
khawksalou omlou ding hi.
Ahihziak in amoh pawkhalou leh LALna
kichi bang a chihthei khalou a milian leh LAL ten khutzat a aneihte uh
LAL dan a kikoih a khatvei sunsun LAL ding ahihdan uh kitheite LAL
zualna ahi mite adia LAL NGEILOU LAL ANAAA.. hon chisak..
©Siamsinna leh Vakiangbu
Comments
Post a Comment