TONGDAM SAN KHELH

By ~ Palemtheilou Papektawl 

                                                  Part -1

Naupang chik ka hih lai in ka pa  natna (BP)  ziak in 1984 kum in amuan Toupa kiang ah ahon na paisan tak ziak in ka nu toh kou unau mi 3 (thum) kia ka hong khosa uhi. Ka min ahih leh Thangboi a hi a, Unau lak a neu pen himahleng ka ute numei tuak ahihman un nautum insung pa ka hong hi ta mai hi. Khosakna lam ah nei lokei mah le ung mi ka englua sam kei uh hi. A ziak bel zanglou lian hun mahmah ka nei ua huai in kum teng ann kham val ahon pe zel ahihman in. Innsung khosakna ahon dawn zangkhai mahmah hi.

Kum 4 ka hong phak in school te ka hong kai panta a lai theithei lou ka hihman in pawl 8 tan chouh ka na kai hi. Hunte hong pai zel in tuailai dinmun ah ka hong ding tou thei sam ta hi. Sing omlouhna a gua kizang chihdan in ka khua uh khota ahihman in mi kidaih luat louh man in tuailai lam ah heutu khat hihna bang ka hon nei sam hi. Tuailaite khua leh khua kivehtuahnate ka neih zel lai un kou khote’n leng kou khua apan kigamla lou km khat vel chouh a kigamla khua khat vehna nei di in pan ka hon la ua.

Huchi in hun sawtlou nung in ka hong kuan kheta uhi. A khua ka tun nitak un kikhopna programme ka nei pah ngal ua thohlawm don hun ahong hihtak in khotualte nungak 4 in thohlawm donna ahon nei uhi. Huchih lai in kei tutna line hong dong nu ka muh tak in hoih ka na sa lopah ngal a amin leh a tanchin theih utna in ka pum dimta hi. Ka lungsim ah bangmah dang a om thei nawn takei a, thohlawm hong dongnu chouh ka ngaih tuahtuah lai in kikhom tawp ahun man ziak in bangmah lou in ka tun nitak uh ka hon zangbei ta hi.

Ka pokram uh nikhat chouh ahihman in a last nitak kikhop tawp in hoih ka na sak guk nu paina ka enzui pah ngal leh ka zinpite inn uh toh kigamla lou inn khat ah alut ka mu hi. Kei leng zinpi a giak di ka hihman in zinpite inlam manawh in ka pai pah ngal hi. Ka tun in lawmte toh thu tuamtuam gen in sawtlou ka kihoulim ua. huchi in ka lawmpa Lianpu toh hoih ka sak guk nu lutna inn amau in ahihleh hihlouh leng thei chiang loupi in huai a pawt di in ka hong vak kheta uhi. A inn uh ka tun tak un a kongkhak uh ka kiuh pah ngal leh “aw’nem tak mai in HONG LUT UAH ahon chi ua. Hoih ka sak nu aw di bang in ka koih pah ngal hi. Ka lut uh leh ka gintak mah bang in ana hi pet a, E….Uthang nong hoh zenzen ua hong tu uah chih toh tuhphah piak ahon thuak a kou leng ka tu suk pah ngal uhi. Nuih mai tak in Uthang bang chisim uh e , na hong pawt zen ua ? ahon chi a, ken leng bang chi i hi di hia , , , nang hong hel dek i ve le ! ka chi thuk sam hi. A pau nawn ma in Lianpu’n Nang na min bang a ? Bang chi’n kon sam di ua ? chi in a dong hi. Aman leng Muamuang ka hi a , “Muang” chi in hon sam le chin, chi in adawng hi. Ken ahihleh Muang, “Na contact number nong pethei diam ? “ chi’n  ka ngen hi. Na deihtaak in chu kon pe mah kei dia chih toh piak ahon thuah a, Hoih ka sakguk mahmah number neita ka hihman in ka lung a kim mahmah ta hi.Sawtpi tut ut mah le ung ka hoh nasan uh toh kirtuak a sawt lua va pawt pen kilawm lou ahihman in, Mangpha kikhak in ka hong kikhenta uhi.

Zinpi ka tun un lawmte ana kimvekta ua kei leh Lianpu apaihak pen in ka pang uh hi. Ka ngaihtuah a kou gel heutu khat hi sam ung a, apaibaih pen di tegel, A paihakpen a ka pang uh ka kisuanglah thak a lah bang teng a kikhelta hi. Huchi in thumna ka nei ua, ka zoh un nitak dak 11 bang ahihtak man in ka lum pah ngal uh hi. Lawmte bel anak puak pah lomlom ua , kei bel ihmu thei lou in ka kihei tuahtuah mai hi. Bangdang ka lungsim ah a om thei nawn ta kei , Muamuang chouh ka ngaihtuah a khuavak ngei kei leh chih bang ka ut mahmah mai hi. A ziak bel kuamah in a hon theihpih louh hang un ken Muamuang te khua a om mai leng nuam sak in ka sa ta hi. Kei ut  thu a hunte om thei lou ahihman in zingkhua a hong vak a, Aw …! nang zing khovak leh nisuak kilawm tak mai ka lungsim hon theipih hi le uh chin zaw maw ,,,, ka chi tuntun a lah a phattuamna a om kei. Ann khong ka nek zoh un paisan ka utlouh leh ka khiaklah mahmah Muamuang te khua taisan in, pianna vangkua leh laizom teng tuibang kichinna lam zuan in ka hong kik nawn ta uhi.

Om na kibanglou hi mah le un phone tung tawn a kihou thei zel ka hihman un lungnopna tak khat chu ka nei veve hi. Ka kithuzak zel ua, huchi in kha 3 bang a hon chin hial tak in ka kimaingal mahmah ta uhi.Tangval nei hia ? neilou chih le ka kan sesea kei. Aziak chu kha 3 bang ka kithuzakta ua himahleh ngaihjawng neilou ahi kei chih a kampaute apan gintakna ka neih man in. Hunsawtpi apan ngai ka hih dante ka gen a kalkhat ka genta, Himahleh amah apan dawnna ka mu ngei kei himhim hi. Lungkelou a gen zel ka hihman in nikhat chu hichi in ahon chi ta hi. ” Uthang hon ngai taktak na hihleh ka kiang ah na sapum mah toh hong pai inla hong gen in, huchi lou in zaw ka gingta kei ding. Phone tungtawn in kamsiam taktak in nanglou leng a hon gen atam mahmah a ken huaite gingta in ka nasang zel hi, Himahleh bangmah tan adaih kei. Hon it taktak na hihleh na kam mahmah in hong gen in. ” a  hon chi ta mai bang chu ka lu ak-tuam chiah pha hi in ka thei zozen hi.

Ka ngai mahmah a himahleh ka taksa mahmah toh a kiang a va gen di pen ka kizu pih tuntun mai hi. Ani  ani a ka ngaihna pung hulhul ahihman in zum a si di kuamah om kei, bang e pasal sum senna di lah hilou a chih lungsim ka hon neita hi.Ka ngaihtuah zel a kei chouh in ngam mahmah lou ka hihman in Lianpu toh ka hong kuanta uhi . Muamuang te khua a ka Ni I  te teng ahihman un zankhat giak di’n ka kisa ua, Ka tun nitak un ka va pawtpah ngal uhi. Ka ngaihdan leh ka itdante ka gen zel a , nitak dak 1 tan in leng dawnna ka muh louhman un ka lungsim a nuam thei taktak kei hi. Tangval neilou ahihdan lah hon hilh a, ka ngaihna leh ka itnate ching sa zoulou  hi di’n ka ngaihtuah hi. Zansawt law mahmah ta ahihman in ka paisan phot uhi. A ninawn sun nitum in ka va pawt nawn ua, dawnna ka muh tuanlouh man un, A nitak in ka va pawt nawn ua himahleh kam khat le dawnna ka mu tuan kei uhi. Kipak tak mai a inn lam paikik di ka kisak lai in ka gintak banglou  tak mai in lungkham leh thazoi vungvung in innlam ka hong paikik nawn ta mai hi.

Muamuang apan dawnna khat bek leng ka muhlouh tel lawmlawm lamdang ka sa. Hon ngailou ahihleh leng gen chiang henla, Hon ngai ahihleh lah genchiang leh chih ka ut mahmah ziak in hem dot in, “ Lungguk lungzuan heh hong nem aw, ” Chih teng message in ka khak hi.Sawtlou nung in ka phone a message khat ahong lutpah a, ken le Muamuang hi dia gingta ka hihman in ka enpah ngal hi. Ka gintak mah bang in ana hi pet a  ka open leh hichi in na a kigelh hi ” Uthang ka chi mah bang in nasa pum mahmah toh na hong gen a hon ngai taktak na hi chih haih vuallouh in ka theih himahleh na hong gen laitak in dawnna ka hon pe thei kei. A ziak chu nang na hon gentam kei a, uLianpu in a gen tam zok ziak in nang kei na hon ngaihdan uLianpu in thei taktak dia gingta lou ka hihman in dawnna khat le hon pelou mah ka hi. Uthang hon ngai taktak na hi chih ka chiang na di in nang kam mahmah in hon gen in….Ka sim zoh in ka lungsim buai chih tak in a buaita mai hi. Tulai pau hi leh (ka si chet)  chih louh kan gen di ka thei kei. Ngailaw mahmah ka hihman in a hon chih bang in kei kam mahmah toh ka itdan leh ka ngaihdan gen di in ka hong kuan nawn ta hi. Hoih tak a le gen theilou in nErvous kawm in ka va thum keuhkeuh ta mai hi. Gen theih dandan a ka gen zoh in leng, Amah apan dawnna kam khat le muh di a om nai tuan kei lai hi. Ka hihtheihna teng ka suah ta a ; himahleh khatvei mahmah leng (Nang na hon it bang in ken le ka hon it ) Chih kampau ka muh louh ziak in tawpsan mai ka sawm ta hi. Mangngilh theihna di lampi ka theih teng ka hih ta a, himahleh a sakmel etlawn tak mai leh a “aw’ suak kilawm tak maite ka lungsim toh henkhop mah bang in a mang thei mahmah kei hi. Mangngilh zou tuanlou ka hihman in ka hong kipan thak nawn ta hi.

Kum khat sung vengveng bang ka genta a ka thugente vailak zunthak bang mai ahihman in ka lung a lel khong ta hi. Huchi in “Muang kum khat sung vengveng na kiang ah ka hon ngaihdan ka genta. Himahleh nang apan dawnna ka muh di a om tuan kei, Phulou ka hihlam kitheilou in na siang laitual ka hong leng zel a,tua bang hun a na zakdah di ka hihkhak leh ka gen khak omte hon ngaidam in aw, hiai teng ka gelh a,  message in ka khak ta hi. Dakkal khatvel kihal in ka phone call a hong pai a,  nuamber vuak ahihman in pick-up in HELLO ka chih leh Muamuang ana hi a, “ Uthang ka tung ah hikhelh bangmah na nei kei, Na hon itna leh ngaihna thupi ka sa. Kei bang mimawl tan di in phulou  bang ka kisa zezen. Hon dawngpah ka ut a himahleh nang ka kiang a na hon ngaihdante na hon gen ni mah in ka khote uh Siama kichi khat in leng hon ngai ahi dante ahon gen a, Dawn di pen theilou in hun sawtpi ka omlai in Siama in lunglel in hon na paisa ta. Himahleh nang itna dik ana hon it ziak in lunlel lou in na hon gen zel a ,  Nang hon itna sang a thupi zaw in ka hon it a, Nang hön ngaihna sang a sang zaw in ka hon na ngai.Tuni a kipan in nang a ka hi ta, nang leng kei a na hita. Lenna tang dang zong  leh kei di’n khuambang na kip in maw ? Kei leng nang a di’n na ginom tawntung ta ning, Sihna khen louh in gibang kikhen kei ni maw , Uthang ? ”  Muamuang kam apan hiai bang thu ka zak in kipahna in ka pum dim ta hi. A langkhat ah ama hon chih bangbang a chih a na taksa mahmah toh ka kiang ah hong gen in chi ka ut mahmah hi. Kuhkal lohchinna ahi chih ka hon thei suah thakthak a, (Bang lam peuh ah kukalna mah pawimoh hi ta ee.!) Ken leng kipahthu ka gen a,  amah hon chiam bang in sihna khenlouh ngal sam gibang khen lou di’n ka chiam thukta hi.Huchi in ann nek lim ni aw chi in kihouna ka tawp santa uhi.

Khovel mi tampi lak a ka itpen leh ka ngaihpen in hon it hon ngaita ahihman in kipak in ka lungsim guk a nuinui mai hi. Ann ka hön nek tak un ka ann kam bang lim diak hi in ka thei hi. Ann ne khawm a nuinui kha ka hihman in ka nu’n lamdang sa ahi ding a,” Thangboi bang kiphana nei e, Na nuinui a ? ” ahon chikhe khong hi. Ken le zumse lou in , ” nu nungak khat ka beih leh hon dawng in chin kipak zak gop nuinui mai ka hi  ” ka chi suk tamai hi. Kipak law mahmah ka hihman in zan leng ihmu theilou in Muamuang toh ka hun zat di dante khöng uh ngaihtuah in ka zan hun ka hong zang bei ta hi..

Hunte hong pai zel in Muamung toh ka kingaih nung uh kumkhat bang ahöng chingta hi.Hunte nuam tak in ka hon zang tou zel ua, Ka na chiamsa mah bang un sihna khen louh ngal hon khen zou om lou di khop in ka hong kingaita uhi. Muamuang nu leh pate’n leng hon daihsak mahmah ua, Kei nu leh pate’n leng hon daihsak ahihman un nuam ka sa mahmah uhi. Hunte nuam tak in singdang kuam mah englou in ka hon zang tou zel ua, Theih louh kal in kum 2 bang ana paimanta hi. Huchi in Muamuang kiang ah, ” Muang, kum 2 bang i kingaita a nang le naupang lua lah hilou chin a khatvei hong lengla le ung chi hita veng aw, Bang ngaih dan na nei ? “ chi in Muamuang ka dawng ta hi, Aman le, ” Uthang, i ngaklah pen hi ven hong lengla ve ua , i nu leh pate’n bang ngaihdan a nei uh hiam ? Kei ngaihdan in zaw poi ka sa kei “ a hon chi thuk sam hi. Ka nu kiang ah ka gen a huchi in inndongtate toh a va lengla ua, Kilem tak mai in a hun leh ni di chiam in ahong kithutuak uhi.

Inn a hong tun phet un ka nu ka na dawng pah ngalh hi. Kha nawn ni 20 di in ka hong kihoulem ta uh ahön chi hi. Ngaklah chih tak in ka ngaklah a.Niteng in calander a ni tung dandan ka kual khum zel a, Ni 10 a hong chin tak in kitenna program ka balw ua mun tuamtuam a tanau laina leh lawm leh vualte chialna leng ka hon neita uhi. Sawtlou chik sung in ahun ahong tung dek petmah a, ni 18 bang ahong hi touta hi. Muamuang ka hel tawpna di chi in khua kigamla lou ka hihman un ka va nitak pawt hi. Sawtlou nung in ka tung a himahleh Muamuang a na om kei hi.  Innsung ka lut toh kituak in ka Ni a hong pawt a  ahon etdan in bang hiam khat a diklou om ahi chih ka thei pah ngal hi. Muamuang omlou  ahihman in potkik a den a ka Ni hon etdan adiklou bang hiam om chih ka theih mahmah ziak in va kan dia potkhiat ka sawm leh Muamuang nu’n, ” Thangboi hong pai dih,  ka gen nop khat om ahi “ chi in ahon sam a, Kei leng thumang tak in ka kinung hei kik ta hi. A room sung ah ahon lutpih a bang gen ut nei hi mahmah hiam chih ka thei ut ziak in, ” NU,  bang a na gen uT? ” chi in ka dong hi. “ Thangboi, Muamuang toh na kiteng di thu uh khosun leh khopua ah a thang suak vekta. Lawm leh vual, tanau lainate teng leng chialna a kinei vekta a, Hichia hou chik a bei sak mai di pen theil haihuai ahi a himahleh nang pen a sianglou (kau/dawi nei) na hih mawk ziak in Muamuang toh kiteng theilou di na hihman in, pai inla na kipah ni a hon kipahpih dia chialna na bawl tengteng ahun atun ma ngei in kham thak in, Kou leng bang teng ka hih fel khinta ua Muamuang leng mundang ah apute kiang ah ka koih mangta uhi. Ka chih bang in va gamtang pah ngal mai in hun hong kikhel kha ding.Tuni a kipan hiai innsung ah lut thei nawn di vual na hi kei ; tu mahmah in leng pawt in, “ chih toh sawn pawt ahon thuak ziak in ka gen ut leh ka kan ut teng kanna di hun a om louh ziak in khase tak mai in ka pai ta hi. Lungsim mumal le ka nei thei nawn kei. Muamuang nu’n hun neuchik bek hon pia hi hen la athu zak diklou koi a kipan hiam chih ka ka dong ut mahmah hi. Himahleh hun piak a omlou a konglam a sawnpawt a om ka hihman in bangmah ka gen theita kei hi.Thazoi vungvung kawm in innlam zuan in ka hong pai ta hi.

Ngaihtuah mumal le nei theilou ka hihman in awl-awl in ka hong pai nepnep a, huchih lai in khomual ka khensuk di kuan in ka nunglam apan ngam khat  in ahong kibohphut mawk a,  kei leng thazoi dildel ka hihman in lampi lai ah a khuplam in ka puksuk ek a,  ka mai bang ka tat puak nop zozen hi. ” Uthang , ana mah di mo ?  Ngaihdam aw kon houpih ma sa kha kei ahi, ” chih “aw’ ging ka zak tak in ka thoutou a ka et leh ka kiang ah Muamuang mittui luang zungzung kawm a ding ka muh tak in a kin theilam in ka dingtou a bangmah gen se lou in Muamuang ka ang ah ka pombelh a gen di thei zosam omlou in ka kikahkhum ek-ekh tamai uh hi.. Sawtlou nung in ka ang a ka kawi na awl in ka khah a, lampi lai ah ka tutsuk pih ta hi. Muamuang in hon en ngamlou in akuun ngeungau a, huchi in a khabe ah len in a lu ka domtou a, ” Muang, hon en in i nu leh pate’n thu dahhuaipi tak mai ana za ua, ana gingta ahihman un i mailam hinkhua kipak tak mai leh nuamsa tak mai a zangtou dia i kisakna teng huih (air) hat tak a nung lak a buh si paih mah bang in na tun in a mutmang ta. Himahleh ka hon itna zaw a bei tuan kei ding. Zuauthu ahihman in nikhat ni chiang in thutak  kithei suah thouthou ding ahihman in, huai hun a tuibang gawm di’n na gin omna ana hatsak zel in aw?”   “Uthang ka tun leh zua te’n deihlou pampaih in ahon paih zawng un kei di’n suangmantam sang in leng na manpha zaw, chik laipeuh in ka selung guk a rose paak etlawm tak mai mah bang in na paak a , ka tun-zua simthu vang in na paak a vul kei ding. Tunitak in zaw ka hon zuisuak dah phot mai dia, himahleh zing chiang nitak dak 12 in hong kuan inla mansa in ka na om di, himahleh hong pilvang mahmah in la ka papite inn ah hon en in..” chi in Muamuang in kei adia thu kipahhuai ahon chiam a, Ka lungkhamna teng paihmang toh a kibang mai hi. Gamlak a om ka hihman un hun sawt zangkhom ut mah le un lem khinlou ahihman in kikhelah tak mai in mangpha kikhak in ka hong kikhenta uhi. Inn ka tun in ka lumpah ngal hi. Zan hun imut limtak mai in ka imu thei vanglak a,  zingkal bang ka khangma zozen hi..Nitak ahong hihtak in Muamuang in ahon chiam bang in nitak in lawmte mi 7 toh ka hong kuanta uhi.

Khua kigamla lou ka hihman un minute 20 vel ka pai zoh nung un Muamuang te khua tung dek mahmah ka hihman un munkhat ah ka khawl ua, Bang chi guk diing chih mahni theihdan chiat sawtkuam tak ka gen zoh nung un hichi in panmun ka hon hawmta uhi.Lawmte ka tonpih teng toh kei sim in mi 8 pha ka himan un, Mi 4 in Muamuang a papite inn ah om taktak hiam chih enkhe di’n ka sawl uhi. Lawmte leng a kuanpah nagl ua Muamuang papite inn ah ui (dog) lei di na nei uh hia ? chi in lawmte leng a valut ngal uhi. Lawmte khat in hon missed-call a, Huai chu Muamuang om ahi chih ahon hilh na ahi.

Huchi tak in kou mi 4teng leng khosung ah ka luttou ngal ua,Muamuang papite inn kiang a dailing liah ah ka va guk et uhi. Muamuang papite’n leng ui (dog) ana zuak nuam zenzen ua himahleh a ui inn a  omlou ahihman in, Innkiim ah a om kha hiam chih en di in Muamuang a hon sawl uhi. Muamuang ahong pawttak in ken leng ka om na ka hilhna dan in ka kibukna dailing kung ka sawiling leh Muamuang in bang chi ngaihtuah a diam ah hong kikoukhe vuamp kha zen houh hi. A papi’n le ,  bang a ? chin in bangkhang ah hong dak leh,Muamuang in leng bang hikei hiai a bawng(cow) ka mu sual a ahi a chih leh alutkik pah vanglak hi. Muamuang in leng ka dailing sawiliinna lam ahon naihphei a, Ka kimuh tak un lawmte 3 toh ka na taita uhi.Khomual ah lawmte ka na ngak ua.Hun sawtlou nung in kou om na lam mahnawh in mi hong kidelh suk thom ging hi omtak ka za a, dingtou a ka et leh lawmte, Khosung mipite toh hong kidelhsuk ana hi maimah uhi. Lawmte’n bang chi ngaihtuah adi uam ah, a 7 un lampi ah ana kivual ua khosung mi khenkhat leh Muamuang nu leh pa singtum suang tum toh hong kuante ana maituah sawm in ana pang mai ta uhi.

Kisatzak petmah di dinmun a a om tak un, akal uah ka dingtou a, Nu, Muamuang ka na it luat ziak a hiai bangteng tung ahi. Muamuang toh ka kikhen di uh na deih mahmah uh chih ka thei, himahleh kikhen zou di vual ka hilouhman un hehpih tak in hon na paisan mai unla, kou leng kipaktak in ka na pai di uh..Muamuang nu kiang ah ka chi tamai hi. Himahleh Muamuang nu zak nop louh lamtak ahihman in a niik singtentou in, Ka mai tang ah…” Thangboi, Na zakta lou mo ? Nang kau nei mihing leh kon sak kei leh ka tanu gu dia mo na hong kuan himhim, Sihna utkei leh ka tanu hon pia inla a kin thei bang pen in ka muh phak louhna ah paimang in,” a hon chi tamai hi.

Hiai bang “aw’ khauh leh sang ka neu apan zakha nailou himhim ka ahihman in ka lungtang tawn a sukha pah a ka chi teng a san gai ta hi. Nang tanu lou leh numei atam nang tanu maimai ken leh ka deih tuan kei chih suk mai bang ka ut, Himahleh Muamuang ka itna in ahon phallouh ziak in ka kidek hamham hi. Bantan hiam ka kihou ua himahleh a lemthei mahmah kei Muamuang paikik mai dia ka sawl chiang in lah “Uthang,  Nang hon ngai nonlou mo ? ” ahon chi zel a,Tonpih suak dia a nu kiang a ka gen chiang inlah tangtel sihtan khak mah bang in a phe tettet zezen hi. A tawp in ka khut a ka let Muamuang chu utlou  hinapi in anu’n a kaikhia a,  asam ah man in a nungkik pihta mai hi.  Kal thum hiam suan pan chih di in Muamuang a hong kihei phei a “aw’ ngaihtak mai in, ” Uthang, KON NGAILUA, ANA LUNGLIAP KEN AW  NIKHAT NI CHIANG IN NANG  A  DI’N KA HONG KIK NAWN DING, NANG TOH LOU  IN ZAW HIAI  SIMLEI TUNG AH KA HING ZOU MAHMAH KEI DING, “ a hon chih ka zak phet in khopawk lou in ka puk ngal hi.

Khua ka hon phok tak in Inn ah ka lupna ah ka na lum a ka kiang ah ka nu mitsan gilgial a tu ka mu hi. Ka nu ka kawi a,  gen di theilou in ka kikah khum ek-ekh mai uhi. “Bawi it in ngaih mahmah le chin le Pathian in nang adia asiam ahi kei a ahi di.Tawpsan mai inla Pathian dawng kawm in adang zong zaw mai in.” chi in ka nu’n kidiik hithit kawm in ahon chi hi. Ka lungsim akhoih petmah a atung in Pathian ana dong a kei thuthu a na pai hi kei leng zaw mo !! Hiai bang teng tuaklou di himah ve ing ka chi tuntun mai hi. Himahleh ngalhaa paaksa  thumkik lou ahihman in, Ka hun beisate tumkik a kithakpat theilou ahi ziak in ka gentheihna lel asuak maimah hi.

Ann lah nelou tui lah dawnlou in lupna ngak in ka hinkhua ka hong zang touta hi. Kal khat bang hichia hun ka zat lai in nikhat Muamuang apan in laithon ka mu a, kipak tak mai in ka hon simta hi.

” Uthang, na dam maw ? Kei leng ka dam, I hun paisate ngai in sun leh zan imulou  leh ann leh tui nelou, dawnlou  a ka om lai in, Ka lungsim ah thu khat a hong suak a,  huai hon gen sawm ka hi a; Na ngaihdan lou  ahihleh na ngaihdamna ka hon ngen masa....

Uthang’ Bangkim siamtu Pathian in ka leitung Pathian ding a ahong piak ka nu leh pate melma khat suakta na hihman in, Thudik hi-in thuzuau hita leh ka nu leh pa thuman kei adi in van Pathian kipahna ahihziak in, Nu leh pa thu a om di-in thutanna ka na bawl khittak ziak in haksa mah leh nang ngilhdan ka na sin tamai ding. Nang leng kei ngilhdan ana sinta mai in ” Tuun-zua, simthu vang hi zolou in, Sian simthu hizaw chi in thuakdan siamta mai ni  ’DAMTAK IN MANGPHA” 

Laikhak….. 

 Muamuang’ .

Muamuang a kipan hichi bang thu ka zak in ka lungsim teipi a dawt hi leh kilawm hial in nat chih tak in a naa hi. Muamuang in a khut mahmah a gelh hi di bang in ka gingta thei kei. A nu’n ka khut apan a kaihkhiat lai in NIKHAT NI CHIANG IN NANG A DI ‘N KA HONG KIK DING achi laite ka lungsim ngaihtuahna ah a kilang dundun mai hi. Muang aw khenlou dia i tongchiamte koilam tungta a hia? Sih tanpa a dia  itna na hon piaksate na lakikta mo?  Ki-oi  hina tel chia !! Kei na tangpa nang tellou in bang chi’n hinkhua ka zang thei dia? Ka selung zuan banna di sulhong heikik ve mo ? Na siang ah laitual kong len lai in, Naubang hon na sanglou hizoaw mai lechin mo? Na tongdam sang khiallou di ka kisak lai in, Sian simthu hiam, Ziin simthu vang hiam kei di’n ’TONGDAM SAN KHELH” Na hi tak mai, Tanglung mawl  in theisiam kei veng…..

Lungdam…

End of part-1   [ Comming soon part 2 ']

©Siamsinna leh Vakiangbu