DUHTHUSAM 2028

By ~ Muana Guite

Mihing duhthusam neilou om ding ging khang, himahleh duhthusam teng tungkim le om di’n ging khang. Duhthusam teng tung hileh dam man a om kei ding. Duhthusam i neih lai ziak ahi di dam man ana om. Ken le kum 2028 chiang a di ka duhthusam kon gen tei maimai di.

Tuban kum 15 nung in nambing chia kikhenna om nawnlou in kithutuak tak in i tengkhawmta ding ua, huchin ah Churachandpur le LAMKA a khek in hong om ta dia. I lampite uh chu a maam mahmah ta ding hi. A gal apat hon ente’n hon eng mahmah ding uh hi. Imphal apat Lamka i hong lut chiang in Kangvai ah KANGVAI AIRPORT ana om ta dia, lampi sik ah singkung lianpi pite’n i gam uh a etlawm sak tuan mahmah ta ding hi. Non taitou zel dia, na veilam pang ah nidang a Peace Ground kichi sek chu ZALENGAM MINI STADIUM chi in ana kikhekta ding a, lamdang sa ken. Tuibuang lak chu Office kai a tam mahmah ziak in Traffic bang ana Jam hial ding hi. Tuibuang Bazar ngei leng ZALENGAM SUPER MARKET ana kichita ding a mihing chu tam in ana tam ding uh hi. Nong tai tou zel dia Sialmat Christian Hospital chu saawng 5 in ana sang ta dia, a sung na va lut leh Elevator khong ana om dia, Doctor te la vaigam a siam a a gen minthangte uh non mu dia, hiaite EIMI ana hi reng a ka hia le na chi mai ding. Huchin nong taitou nawn dia, Lamka Police Station chu nidang a mite simmoh ana hi nawn kei dia, mipite toh kituak tak in naa ana semkhawm ta ding uh hi. Traffic Police non muh chiah …..hiai te Traffice Police maw?? chi in nang leh nang na lungsim in na kidong dia ! Nalh na sak luat ziak in Traffic Police hih bang na ut hial ding hi. Old Bazar ngei leng Zenhang Super Market ana kichita a, building sawng 2 bang ana hita venvon mawk hi.

Huchin ah nidang ah Republic Day kizat sekna mun Public Ground chu Phungkhothang Football Stadium ana kichita dia, na manglam na sa hial ding. Teddim Road ah nong taitou nawn dia, Nehru Marg – IB Road Junction ah Raja Goukhothang Flyover thupi deuh mai ana om dia, Lamka a om di’n na ging kei hial ding hi. New Bazar ngei leng nidang a New Bazar dan maimai ana hi nawn kei dia, Tunkhopum Shopping Complex ana kichi ta hi. Na lungsim in Lamka chu hi chi di’n ka ging kei rengreng na chi vungvung ding hi. Hmuia Veng nong tung tou dia, lamsak lam ah YMA Auditorium thupi deuh mai non mu ding hi. Koi hia, PT Sports Complex ka va en himhim di na chi dia, amun na tun tak in Welcome to ZOGAM STADIUM chih ana kitaak dia, a sung na va lut chu Zogam Salphate min ana kitaak dia na lung bang a leng zaw zen ding hi. Zogam Stadium a pat na dak suk leh Rengkai na mu dia, huai ah chu SINLUNG Indoor Stadium na gal muh ding hi.

Lamka hi ana khang mahmah ngut a, Pathian in Nekguk takgukte subei ding in KHAMTHEIH KUMPI chia minloh a om mikhat hon pe dia, huai Pa’n chu khamtheih a sumdawng in hauhsak chi tak in hong hausa dia, Gang khat hon phut ding a, huai gang in chu Nekguk takgukte enkai in Officer/Contractor/MLA leh adangdang negu hatte Khovel apat hon koih mang geihgeih ding ua, nekgukna chu hong kiam hiaihiai ding a, mipite’n Huai khamtheih kumpipa ah muan ngamna hon koih ding ua, Lamka chu Nekgukna in hon maingal nawn kei ding a, development work leng hoih tak in hong paita ding hi.

Singtang lam leng hoih tak a puah ahih taak man in Tourist te’n hong veh zeuhzeuh ta ua, i singtang mehte uh Khovel theih phak in a om ta hi. Singtang lam ah foreigners te a lut tam mahmah ziak un singtanglam chu hong khang hulhul a, lampite bang maam hinhen in a om a, helipad bangzah hiam le bawl in a om hi. Sing leh loute’n i gam uh a etlawm sak mahmah a, mite mit hiip thei di hial khop in a nalh mahmah ziak in foreign apat kumteng in mi bangzah bangzah hiam in hong pha zel uh hi.

Lamka mi gamdang a siamna sangpi neite’n innlam veina hon nei ding ua, khaloh tampite taisan in ami-asate khualna in Company neu nounou hon pankhe ding ua, tuailai hih di theilou tampite sepna hon pe ding ua, tuailai mahni kitoudelh chu hong pungta ding uh hi. Khamtheih Kumpipa’n mabang ana patsa nekguk hatte a that ziak ahi ngei ding a, Govt ah sepnate sum leh pai a lei thoh chihte a om nawn ta kei ding a, Govt a semte’n leng a nekguk taktak theih nawnlouh ziak un Govt sepna chu nidang bang in kuaman a enlah nawn kei ding ua, sepna deih a tawm mahmah ziak un sum leh pai va pe guigui chihte omlou in sepna apply te chu a siamna mah un sepna a muta ding uh hi. Government school/college te le nidang a bang nawn ta kei a, Teacher leh Lecturer te le a kai kei ua leh a hinna adia lauh huai ahih ziak in, Government institution te chu private a sang in mipi’n a delh zaw ta ding uh hi.

Minister/MLA utte’n leng mipite hai nawnlou ahih chiang un, sum leh pai a kuaman vote a zong theih nawnlouh chiang un Minister/MLA hih ut te’n chu Mipite maipha a zong siam uh a ngaita hi. Nidang bang a mipite’n Minister/MLA te maipha zong nawnlou in, Minister/MLA te’n mipite maipha aleh zong zaw uh hi. Huchin ah Minister/MLA te’n mipi khuallou a, amau gilsung chauh a khual ua leh mipite’n a paih khiak khak ding uh a lauh ziak un mipite akhual mahmah uh hi.

Lamka chu namtengte adi’n mun nuamtak ahi ding a, kum 2028 chiang in nang kua mi na hiam ??? chihte omlou in kithutuak in NAMCHIH teng i tengkhawm ding uh hi.

©Siamsinna leh Vakiangbu