KA NU' ZUAU GEN

Shared By ~ Ka Thei Zou Kei

Ka neulai apat in kon gen ding. Inkuan khosak haksa tak mai insung apan ka hong khang khia hi. Kou inkuan in ahihleh, ka duh leh lunggulh uh nek ding ka mu pha baan kei ua, ka muhzoh peuh uh duh dan ka kizil tawm zel uhi. Ann ginatak a ka nek louh ni uh leng omsek hi. Khua kon theih deuh apan in, innkuan genthei tak ka hi uh, chih ka hon theisiam pan a. Huaiziak i n, ka nu-le-pa kiang ah leng, amau ading a thilhih haksa lua hih ding in ka phut ngei himhim kei hi.

Zingkal khat houh ka phailel uh a awng a, an nek ding kidaih ka neikei uhi. Ka annek kuang chiat uah an bangzah hiam tuh ka thuuk ngei mai ua. Ahihziak in, ka kuang ua ann kithuuk ka kham khop kei ding uh chih a kilang chian mahmah hi. Huaitung in, ka nu’n ama ankuang keilam a hon khiin phei in ‘ bawi, hiai leng ne in, kei zaw ka gil akial kei’ chi hi. Ka nu zuau gen khat veina.

Niteng in ka nu-le-pa a kiloh sek ua, nipi kaal tawp chiang in Pathian Ni zing khat ameh ding sa tamlou khai kawm in, inn hong tung zel uhi. Pathian ni zingkhat, ka saguh kheuhsa ka nu’n a kheuh teuhteuh hi. Huai muh nuamsa lou lua ka hih chiang in, ka nu kuang sung ah satak neukha khat ka koihsak a. Ka nu’n ‘bawi nang ne zaw in, ken zaw sameh ngaina khollou kei ve’ hon chi hi. Hiai ka nu zuaugen nihvei na.

Skul kai thei vual ka hong hih in, ka nu’n sunchia ka pa toh akilohna thaman kia ua skul hon kaisak zoulou ding ahi uh chih atheih ziak in, nitak a asep theih ding amuh peuh inn ah ahon tawi zel hi. Nitaklam khat kuva gah, nitak a kheh a kilohna ding ahon tawi hi. Nitak annek kham akipan ka nu toh huai kuva gah ka kheh pan ngal ua. Zan hong sawt tak in ka ihmut hong suak a, ka nu kiang ah ‘nu lumta ni, ka ihmut suak’  chi in luppih ding in ka zawn hi. Ka nu’n ‘ bawi, nang ana lum masa in, kei zaw ka ihmut a suak naikei’ hon chi hi. Hiai ka nu zuaugen thumvei na.

Kum tawp exam kon nei ua, exam tawp ni in ka nu’n nisa nuai ah ka tawp hun ding hon na ngak ngitnget hi. Ka tawp phet un skul sung apan taikhia in, ka nu ka va kawi tonton ngal hi. Ka nu’n ka tawp chia ka dawn ding singpi nou khat khuh kheukhau in hon na koih sak a. Huai singpi lum pilhpelh ka phai louh suk kuihkuih hi. Singpi dawn kawm a ka nu ka etleh, kei ading a khualna lam a, agim-le-tawl dan ka mu a, ka singpi dawn lai akiang ah “nu nang hiai teng dawn in” chi in ka pia hi. Ka nu’n “bawi, nang dawn gaivek mai in, kei zaw ka dang a taak kei” hon chi hi. Hiai hih ka nu zuau gen li veina ahi.

Huchi bang a ka khosak uh haksat naaklai in ka pa hong si zaw mah a; ka nu’n nidang a asep gimteng sang a aleh nih a asep gim ngai tou nawnsawn hi. Ka inn kiang nai chik uah ka paneute a om ua. Ka haksatna uh ahih theih tantan un ahon panpih zel uhi. Ka khosak haksat dan uleh, ka nu gimdan amuh chiang un, hon awlmoh a, hon lainattu kichi khen khatte’n ka nu kiang ah pasal dang nei mai ding in hasuan sek uhi. Huai chiang in ka nu’n “koppih kiphamoh keng” chih san zel hi. Hiai hih ka nu zuau gen nga veina ahi.

BA ka pass khit chiang in sepna bang ka mu theisam a. Loh nei hita mah leng ka nu’n nidang a a om dan akheng thei nai tuan kei hi. Ka loh laak masak kimkhat ka thot leh hon thon kik a, “bawi, ka kiphatmoh zah sum ka nei na” chih a laithon ah hon gelh tel hi. Hiai hih ka nu zuau gen guk veina ahi.

Sep nei kawm in MA ka zil sunzom tou zel a, vangphat huai tak in MA leng ka hon zou hi. MA ka hong hih chiang in, ka sepna a ka loh leng ahong pungtou zel a. Huchi a ka dinmun hong hoihtouh deuh chiang in ka omna lam a om ding in, ka nu va pi ka hong utta hi. Ahih ziak in, ka nu’n “bawi, inn nuam leh hoihpi ateen siam kei ning” chi in hon nial hi. Hiai hi ka nu zuau gen sagih veina ahi.

Teek nung in ka nu’n cancer hon vei chitchiat a. Huai ka theih phet in ka omna gamla tawk mahleh, ka nu omna lam ah ka va pai vengveng a, a omna damdawi inn ah ka va lut ngal hi. Damdawi inn lupna tung ah ka nu amah kia in ana lum bimbem a. Ka nu gawn dan leh, a taksa siat dan ka muh in, kideek zou nawn mahmah lou in amuh lai ngei in ka kapkha hi. Ka nu’n “bawi, kap kei ve, ka bang mah a natlouhpi” hon chi hi. Hiai hih ka nu zuau gen giat veina chiahchiah ahi.

[By ~ TuaiSiala (Misual.com­)]

©Siamsinna leh Vakiangbu