THANMUALSUAHNA NGAIHBEL

By ~ Vz Vualnam

Sinlai khau bang ka hualhual chia’n

Simlei mi singta zatamte’ di’n

Thanmualsuahna zatam lai ah

Sial bang lian bel bang ahiam chi’ng 

Sakmin ngaih bel bang a hiam chi’ng

Zata’n sesum hon sing in sia e

Zata’n langlam mantung lam e

Zata’n saumang kitawi suang e

Zata’n sakminhoih sial bang lam e

Sesum hon sing a sete’ tuun

Sungkial in mim bang thuum thei e

Langlam mantung lamte’ tuun

Silhpuan baat ding baansam thei e

Saumang kitawi suangte’ tuun

Zal na’ng laikhun baansam thei e

Sakmin hoih sial bang lamte’ tuun

Sau ah khakham toh hei thei e

Selung khau bang ka hualhual chia’n

Sesum hon sing in i selah zong

Langlam mantung i lamlah zong

Saumang kitawi i suanglah zong

Sakminhoih i sial bang i lamlah zong

Tuun-le-zua’n sen a hon oihna zaila

Tuuk taang bang tung in

Tuun-le-zua tum bang vuai kuan

I liimsawl bang beel in

Zaitha tawl laan bang nga leh aw

I baanzal tui bang ne leh aw

Thanmualsuahna zatamlai ah

Sial bang lian bel chi ding hi’ng e

Sakmin ngaih bel chi ding hi’ng e

Tuun-le-zua’ tawi von deih zatamte’n

Tuuntha-zuatha kheek ding

Hanlung chiam ni e

 ——————————————

 Ka suutsuut chiang in leitung a lohchinna tengteng lak ah bang thupipen ding ahiam ka chi hi. Tampite’n sum tampi a kaikhawm ua, tampite’n gou thupi taktak a lam ua, tampite’n inn hoih taktak a lam ua, tampite’n minthanna i ngah uhi. Himahleh sum tampi kaikhawmte’ nu gilkial in a thuum thei a, gou thupitak neite’ nu puansilh ding tasam in a om thei a, inn hoihtak lamte’ nu giahna ding neilou in a om thei a, mi minthang mahmahte’ nu leng lungngaihna thupitak toh hinkhua a zangthei hi. Ka ngaih sutsut chiang in sum tampi i kaikhawm keita zong in, gou thupitak i lam zoukeita zong in, inn thupitak i suang zoukeita zong in, minthanna i ngah zoukeita zong in, i nu-le-pa’n i neulai a ahon oihna la uh taangtung in, i nu-le-pa teek ding a kisate’n i sepsa i tha ne in tawldam le uh, huai tuh lohchinna tengteng lak a athupipen ahi ding ka chi hi. Nu-le-pate’ ta deihthoh kuapeuh in nu-le-pa’ tha kheek ding in kisuuk ni.

©Siamsinna leh Vakiangbu